Tath Kana Movie: अभिनेता उमेश कामत आता एका वेगळ्या भूमिकेत प्रेक्षकांसमोर येतोय. त्याचा आगामी चित्रपट ‘ताठ कणा’ 28 नोव्हेंबरला प्रदर्शित होणार आहे. या चित्रपटात तो एक ध्येयवेडा, संशोधनात रमलेला डॉक्टर साकारत आहे — जो रुग्णांच्या वेदनांशी लढताना स्वतःलाही नव्या आव्हानांना सामोरा जातो.
‘ताठ कणा’ ही केवळ एका डॉक्टरची कथा नाही, तर जिद्द, संघर्ष आणि मानवी संवेदनांची गोष्ट आहे. जागतिक ख्यातीप्राप्त न्यूरोसर्जन डॉ. प्रेमानंद रामाणी यांच्या विलक्षण आयुष्यावर हा चित्रपट आधारित आहे. आजही 86 वर्षांच्या वयात ऑपरेशन थिएटरमध्ये सर्जरीसाठी सज्ज असणाऱ्या या व्यक्तिमत्वाचं जीवन म्हणजे प्रेरणेचा स्रोत आहे.
चित्रपटात दाखवलं आहे की, अत्यंत कठीण परिस्थितीत वाढलेले एक युवक डॉक्टर होण्याचं स्वप्न पूर्ण करतात. परदेशात शिक्षण घेत असताना त्यांच्यावर गंभीर आरोप होतो, पण त्यातून ते स्वतःला सावरतात आणि परत देशात येऊन रुग्णसेवेला वाहून घेतात. द्वेष आणि अविश्वासाचा सामना करत ते आपल्या संशोधनासाठी झटत राहतात.
एका क्षणी त्यांच्या कामावर प्रश्नचिन्ह उभं राहतं आणि त्याच वेळी ‘प्रेमा’च्या हाकेने त्यांना नवीन जबाबदारी घ्यावी लागते. इतरांच्या ‘पाठीचा कणा’ बरा करत करत ते स्वतःच्या आयुष्याचा तोल सांभाळतात — याच संघर्षाची कहाणी म्हणजे ‘ताठ कणा’.
या चित्रपटात उमेश कामतसोबत दीप्ती देवी, सायली संजीव, सुयोग गोऱ्हे, अजित भुरे, शैलेश दातार, अनुपमा ताकमोगे, रवी गोसाई आणि संजीव जोतांगिया हे कलाकार झळकणार आहेत. चित्रपटाचं छायांकन कृष्णकुमार सोरेन यांनी केलं असून, संकलन निलेश गावंड यांचं आहे. संगीत अविनाश-विश्वजीत यांनी दिलं आहे, तर कार्यकारी निर्माते प्रशांत पवार आहेत.
‘ताठ कणा’ हा चित्रपट प्रेक्षकांना एका डॉक्टरच्या जिद्दीचा आणि मानवी भावनांचा प्रेरणादायी प्रवास दाखवणार आहे.
अधिक बातम्या वाचण्यासाठी येथे क्लिक करा.
Related Posts
मी मराठी चित्रपट, टीव्ही शो आणि ओटीटीवरील नवीन अपडेट्स, रिव्ह्यू आणि ट्रेंडिंग बातम्या वाचकांपर्यंत पोहोचवतो. वेगवान, स्पष्ट आणि फॅक्ट-बेस्ड रिपोर्टिंग करणं हे माझं वैशिष्ट्य आहे.