‘चिमणा’ची सुरुवात पारंपरिक ग्रामीण धाटणीच्या ओळींनी होते. ‘एक चिमणा चिवचिवला, माझा साजन जागा झाला हो, सूर्य उगवला’ या ओळींमधून महाराष्ट्राच्या लोकसंगीताची झलक मिळते. त्यानंतर गाणं थेट बादशाहच्या खास हिप-हॉप शैलीत वळतं.
पारंपरिक मराठी संगीत आणि आधुनिक रॅप यांचा मेळ या गाण्यात साधण्यात आला आहे. महाराष्ट्राच्या स्थानिक बोली आणि वातावरणाशी जुळणाऱ्या शब्दांचा वापर करत बादशाहने आपल्या रॅपचा तडका दिला आहे. ‘डान्स कर रही देखो माऊशी माऊशी, नाचो जब तक सुबह चिडिया बोले’ अशा ओळींमुळे गाण्याचा अंदाज आणखी वेगळा झाला आहे.
‘चिमणा’बद्दल बोलताना बादशाहने भारतातील प्रादेशिक संगीताबद्दल आपलं प्रेम व्यक्त केलं. महाराष्ट्राच्या समृद्ध सांस्कृतिक आणि सर्जनशील परंपरेला सलाम करण्यासाठी हे गाणं केल्याचं त्याने सांगितलं. महाराष्ट्रातील आपल्या सुरुवातीपासूनच्या चाहत्यांसाठी हे गाणं खास असल्याचंही त्याने म्हटलं.
या गाण्याच्या म्युझिक व्हिडीओचं कोल्हापुरात शूटिंग करण्यात आलं आहे. त्यामुळे व्हिडीओमध्ये कोल्हापूरच्या परिसराची आणि स्थानिक संस्कृतीची झलक पाहायला मिळणार आहे. महाराष्ट्राची वेगळी ओळख आणि स्थानिक वातावरण गाण्याच्या सादरीकरणातही दिसून येतं.
दिव्या कुमार आणि नागेश मोरवेकर यांच्या सहभागामुळे गाण्याला पारंपरिक संगीताची बाजू मिळाली आहे. तर बादशाहच्या रॅपमुळे त्याला आधुनिक रंग मिळाला आहे. त्यामुळे मराठी लोकसंगीत आणि हिप-हॉपचा हा प्रयोग संगीतप्रेमींसाठी वेगळा अनुभव ठरू शकतो.
‘चिमणा’ 31 ऑगस्ट 2026 पासून सर्व प्रमुख म्युझिक स्ट्रीमिंग प्लॅटफॉर्मवर उपलब्ध झाला आहे. बादशाहचा मराठी संगीतविश्वातील हा पहिला प्रयत्न प्रेक्षकांना कितपत आवडतो, हे पाहणं उत्सुकतेचं ठरणार आहे.
अधिक बातम्या वाचण्यासाठी येथे क्लिक करा.
Related Posts
मी मराठी मनोरंजन क्षेत्रातील नवीन चित्रपट, सिरीयल्स आणि सोशल मीडियावर ट्रेंड होणाऱ्या घडामोडींवर खास लेखन करते. अचूक माहिती आणि वाचकांना समजेल अशा सरळ शैलीत रिपोर्टिंग करणं हे माझं प्राधान्य आहे.