Khashaba Movie: मराठी चित्रपटसृष्टीतील दिग्दर्शक नागराज मंजुळे पुन्हा एकदा प्रेक्षकांसाठी नवा चित्रपट घेऊन येत आहेत. त्यांच्या आगामी ‘खाशाबा’ या चित्रपटाचा ट्रेलर प्रदर्शित झाला असून, आता सर्वांचे लक्ष मुख्य भूमिकेत दिसणाऱ्या नव्या अभिनेत्याकडे लागले आहे.
‘फँड्री’, ‘सैराट’ आणि ‘नाळ’ यांसारख्या चित्रपटांमधून नागराज मंजुळे यांनी वेगळ्या कथा आणि नवे कलाकार प्रेक्षकांसमोर आणले. त्यांच्या प्रत्येक चित्रपटातून एखादा नवीन चेहरा चर्चेत आला आहे. त्यामुळे ‘खाशाबा’मध्ये यावेळी कोणाला संधी मिळाली आहे, याची उत्सुकता वाढली आहे.
हा चित्रपट भारताला ऑलिंपिकमध्ये पहिले वैयक्तिक पदक मिळवून देणारे कुस्तीपटू खाशाबा जाधव यांच्या जीवनावर आधारित आहे. १९५२ च्या हेलसिंकी ऑलिंपिकमध्ये त्यांनी प्रतिकूल परिस्थितीवर मात करत कांस्यपदक जिंकले आणि भारतीय क्रीडा इतिहासात आपले नाव सुवर्णाक्षरांनी कोरले.
चित्रपटाच्या ट्रेलरमध्ये जितेंद्र जोशी, महेश मांजरेकर, गिरीश कुलकर्णी, संदीप कुलकर्णी, संदेश कुलकर्णी, सुरेश विश्वकर्मा, वैभव मांगले, छाया कदम आणि गार्गी कुलकर्णी यांसारखे अनेक दमदार कलाकार दिसत आहेत. मात्र मुख्य भूमिका साकारणाऱ्या अभिनेत्याचे नाव अद्याप जाहीर करण्यात आलेले नाही.
विशेष म्हणजे ट्रेलरमध्येही त्या अभिनेत्याचा चेहरा स्पष्टपणे दाखवलेला नाही. या भूमिकेसाठी हजारो इच्छुक कलाकारांमधून कठोर निवड प्रक्रिया पार पडल्यानंतर एका नव्या चेहऱ्याची निवड करण्यात आल्याची माहिती आहे.
यामुळे ‘खाशाबा’च्या प्रदर्शनापूर्वीच मुख्य अभिनेता कोण असणार, याबाबत प्रेक्षकांमध्ये मोठी चर्चा सुरू झाली असून, नागराज मंजुळे यावेळी कोणता नवा कलाकार मराठी चित्रपटसृष्टीला देणार, याकडे सर्वांचे लक्ष लागले आहे.
अधिक बातम्या वाचण्यासाठी येथे क्लिक करा.
Related Posts
मी मराठी मनोरंजन क्षेत्रातील नवीन चित्रपट, सिरीयल्स आणि सोशल मीडियावर ट्रेंड होणाऱ्या घडामोडींवर खास लेखन करते. अचूक माहिती आणि वाचकांना समजेल अशा सरळ शैलीत रिपोर्टिंग करणं हे माझं प्राधान्य आहे.