आता पूर्व विदर्भातही देवराई उभारण्याचा उपक्रम सयाजी शिंदे आणि त्यांच्या सहकाऱ्यांनी हाती घेतला आहे. मात्र, या कामासाठी वन विभागाकडून नियम आणि कायद्याच्या अटींचा दाखला दिला जात असल्याने सयाजी शिंदे यांनी प्रशासनाच्या भूमिकेवर प्रश्न उपस्थित केले आहेत.
नागपूर जिल्ह्यातील काही ग्रामपंचायतींनी गावांच्या परिसरात देवराई विकसित करण्यासाठी सयाजी शिंदे यांच्या फाऊंडेशनसोबत काम करण्याची इच्छा व्यक्त केली आहे. यासाठी वन विभागाकडे जागेची मागणी करण्यात आली. मात्र, संबंधित जागा राखीव वनक्षेत्र असल्याचं सांगत वन विभागाने तिथे वृक्षारोपणाला परवानगी देता येणार नसल्याची भूमिका घेतली.
यावर सयाजी शिंदे यांनी नाराजी व्यक्त केली आहे. झाडं लावून जंगल वाढवण्याचा प्रयत्न केला जात असताना त्यासाठीही कायदेशीर अडचणी का निर्माण केल्या जात आहेत, असा त्यांचा सवाल आहे. पर्यावरण संवर्धनासाठी पुढाकार घेणाऱ्या संस्थांना सहकार्य करण्याऐवजी नियमांचा अडसर निर्माण होत असल्याची भूमिका त्यांनी मांडली आहे.
नागपूर जिल्ह्यातील बेला ग्रामपंचायतीने गावालगत देवराई उभारण्यासाठी जागा उपलब्ध करून देण्याची मागणी केली आहे. मात्र, वन विभागाने ही जागा राखीव वनक्षेत्र असल्याचं सांगितलं आहे.
सयाजी शिंदे आणि त्यांच्या सहकाऱ्यांच्या म्हणण्यानुसार, या जागेवर सध्या मोठ्या प्रमाणावर झाडं नसून काही भागात अतिक्रमण करून शेती केली जात आहे. त्यामुळे वृक्षारोपणासाठी नियम सांगण्यापूर्वी जागेवरील अतिक्रमणाकडे लक्ष द्यावं, असा सवाल त्यांनी उपस्थित केला आहे.
या विषयावर सयाजी शिंदे यांनी काही दिवसांपूर्वी मुख्यमंत्री देवेंद्र फडणवीस यांचीही भेट घेतली होती. महाराष्ट्रातील देवराई प्रकल्पांसाठी वन विभागाचं सहकार्य मिळावं, अशी मागणी त्यांनी केली.
त्यानंतर मुख्यमंत्र्यांनी राज्यातील जिल्हाधिकाऱ्यांना त्यांच्या फाऊंडेशनला नियमांनुसार सहकार्य करण्याच्या सूचना देणारं पत्र दिल्याचं वृत्त आहे. मात्र, त्यानंतरही काही ठिकाणी वन विभागाकडून परवानगी आणि नियमांचा मुद्दा उपस्थित केला जात असल्याने सयाजी शिंदे यांनी नाराजी व्यक्त केली आहे.
देवराई आणि वृक्षसंवर्धनाच्या या उपक्रमाला प्रशासनाकडून प्रत्यक्षात किती सहकार्य मिळतं आणि राखीव वनक्षेत्राच्या नियमांबाबत पुढे काय निर्णय होतो, याकडे आता लक्ष लागलं आहे.
अधिक बातम्या वाचण्यासाठी येथे क्लिक करा.
Related Posts
मी मराठी मनोरंजन क्षेत्रातील नवीन चित्रपट, सिरीयल्स आणि सोशल मीडियावर ट्रेंड होणाऱ्या घडामोडींवर खास लेखन करते. अचूक माहिती आणि वाचकांना समजेल अशा सरळ शैलीत रिपोर्टिंग करणं हे माझं प्राधान्य आहे.