टीव्ही आणि इतर सार्वजनिक व्यासपीठांवर मेरी कोम यांनी केलेल्या काही वक्तव्यांमुळे आपली प्रतिमा आणि प्रतिष्ठा खराब झाल्याचा आरोप ऑनलर यांनी केला आहे. हे प्रकरण BNS कलम 356 अंतर्गत दाखल करण्यात आल्याचे सांगितले जात आहे. दोष सिद्ध झाल्यास या कलमानुसार दोन वर्षांपर्यंत कारावास, दंड किंवा दोन्ही शिक्षा होऊ शकतात.
या प्रकरणाची पुढील सुनावणी 19 नोव्हेंबर 2026 रोजी होणार आहे.
ऑनलर कोम यांनी या कायदेशीर कारवाईला दुजोरा दिला आहे. आपण कायदेशीर लढाई लढत असल्याचे त्यांनी सांगितले. मात्र, प्रकरण न्यायालयात विचाराधीन असल्याने याबाबत अधिक माहिती देण्यास त्यांनी नकार दिला.
“माझ्याकडे मजबूत केस आहे. मला भारताच्या न्यायव्यवस्थेवर विश्वास आहे. प्रकरण विचाराधीन असल्याने मी यावर आणखी कोणतीही टिप्पणी करणार नाही,” असे ऑनलर यांनी म्हटल्याचे रिपोर्ट्समध्ये सांगण्यात आले आहे.
मेरी कोम यांनी यापूर्वी ऑनलर यांच्यावर आर्थिक गैरव्यवहाराचे गंभीर आरोप केले होते. आपल्या बॉक्सिंग कारकिर्दीतून कमावलेले कोट्यवधी रुपये गैरव्यवहारामुळे गमावल्याचा दावा त्यांनी केला होता.
तसेच आपल्या नावावर कर्ज घेण्यात आले, काही जमिनी गहाण ठेवण्यात आल्या आणि काही मालमत्ता आपल्या संमतीशिवाय ऑनलर यांच्या नावावर हस्तांतरित करण्यात आल्याचे आरोपही मेरी कोम यांनी केले होते.
मात्र, ऑनलर यांनी हे आरोप सातत्याने फेटाळले आहेत. त्यांनीही मेरी कोम यांच्यावर काही आरोप केले असून, आपल्या दाव्यांचे पुरावे सादर करण्याचे आव्हान दिले होते.
सुरुवातीला या प्रकरणाला कायदेशीर वळण देण्याची इच्छा नव्हती, अशी माहिती ऑनलर यांच्या जवळच्या सूत्रांच्या हवाल्याने देण्यात आली आहे. मात्र, मेरी कोम यांनी केलेले आरोप खरे आहेत का, असा प्रश्न कुटुंबीय आणि मित्रांकडून त्यांना विचारला जाऊ लागला. त्यानंतर त्यांनी कायदेशीर कारवाई करण्याचा निर्णय घेतल्याचे सांगितले जात आहे.
आता ऑनलर मेरी कोम यांच्याकडून माफी आणि नुकसानभरपाईची मागणी करत असल्याचेही रिपोर्ट्समध्ये म्हटले आहे. त्यांच्याविरोधात करण्यात आलेले आरोप निराधार असल्याचा ऑनलर यांचा दावा आहे. या आरोपांमुळे आपल्याला मानसिक आणि सामाजिक तणावाचा सामना करावा लागल्याचेही त्यांनी म्हटले आहे.
दरम्यान, या प्रकरणाचा मेरी कोम यांच्या बिग बॉसच्या सहभागावर परिणाम होणार का, याकडेही लक्ष लागले आहे. न्यायालयीन प्रक्रियेदरम्यान त्यांची वैयक्तिक उपस्थिती आवश्यक ठरल्यास त्यांना काही काळासाठी बिग बॉसच्या घराबाहेर यावे लागू शकते.
मात्र, सध्या मेरी कोम यांना बिग बॉसचा शो सोडावा लागेल की नाही, हे स्पष्ट झालेले नाही. पुढील सुनावणी 19 नोव्हेंबर 2026 रोजी होणार असून, त्यानंतरची परिस्थिती न्यायालयाच्या निर्देशांवर आणि शोच्या नियमांवर अवलंबून असेल.
अधिक बातम्या वाचण्यासाठी येथे क्लिक करा.
Related Posts
मी मराठी मनोरंजन क्षेत्रातील नवीन चित्रपट, सिरीयल्स आणि सोशल मीडियावर ट्रेंड होणाऱ्या घडामोडींवर खास लेखन करते. अचूक माहिती आणि वाचकांना समजेल अशा सरळ शैलीत रिपोर्टिंग करणं हे माझं प्राधान्य आहे.