‘देवघर’ आणि ‘रेंट’ या दोन शब्दांमागे नेमकं काय गूढ दडलं आहे, याची उत्सुकता ट्रेलरमुळे वाढली आहे. कर्म, नियती आणि नशिबाचा खेळ यासोबतच पोलीस तपास आणि गुन्हेगारी जगताची पार्श्वभूमीही कथेत पाहायला मिळणार असल्याचे संकेत मिळतात.
‘देवघर ऑन रेंट’ हा चित्रपट 25 सप्टेंबर 2026 रोजी प्रदर्शित होणार आहे. महाराष्ट्रासह बेळगाव, हैदराबाद, इंदोर आणि बडोदा येथेही हा चित्रपट प्रेक्षकांच्या भेटीला येणार आहे.
ट्रेलरच्या सुरुवातीपासूनच चित्रपटातील गूढ वातावरण जाणवतं. संशयास्पद घटना, पोलीस तपास, संघर्ष आणि व्यक्तिरेखांमधील तणाव यामुळे कथानकाची उत्सुकता वाढते. एका रहस्यमय देवघराभोवती घडणाऱ्या घटनांची गुंफण यात पाहायला मिळते.
चित्रपटात ॲक्शनलाही महत्त्व देण्यात आलं आहे. पाठलाग, हाणामारी आणि संघर्षाची दृश्ये ट्रेलरमध्ये दिसतात. त्यासोबत आध्यात्मिक संदर्भ आणि काही अनाकलनीय घटनांमुळे चित्रपट केवळ ॲक्शनपुरता मर्यादित नसल्याचे दिसते.
‘देवघर ऑन रेंट’ची निर्मिती सचिन रोडे पाटील आणि पूनम चौधरी पाटील यांनी केली आहे. आनंदी पिक्चर्स अमरावती प्रस्तुत आणि राधाकृष्ण प्रोडक्शन निर्मित या चित्रपटाचे दिग्दर्शन स्वरूप सावंत यांनी केले आहे. चित्रपटाची संकल्पना पूनम चौधरी पाटील यांची असून कथा, पटकथा आणि संवाद संजय नवगिरे यांनी लिहिले आहेत.
चित्रपटात निखिल चव्हाण, अंकित मोहन, भाऊ कदम, शशांक शेंडे, अश्विनी चवरे, वैभव चव्हाण, सुरेश विश्वकर्मा, अनिल नागरकर, सिद्धेश्वर झाडबुके आणि गौतमी पाटील यांच्या भूमिका आहेत. ‘केजीएफ’ फेम गरुडा राम आणि श्रवण राघवेंद्र हे दाक्षिणात्य कलाकारही महत्त्वाच्या भूमिकांमध्ये दिसणार आहेत.
चित्रपटातील गाण्यांना संगीतकार एस. सागर आणि कबीर शाक्य यांनी संगीत दिलं आहे. कोरिओग्राफी किशोर दळवी यांनी केली आहे. सिनेमॅटोग्राफी चैतन्य साळुंके यांनी, तर पार्श्वसंगीत रोहित नागभीडे यांनी केलं आहे.
चित्रपटातील ॲक्शन सीक्वेन्सची जबाबदारी राकेश पाटील आणि कार्तिक डंगरी यांनी सांभाळली आहे. कला दिग्दर्शन दिलीप कंधारे यांनी, तर वेशभूषा अपेक्षा गांधी सोनी यांनी केली आहे. रंगभूषेची जबाबदारी सुजीत सुरवसे यांनी घेतली आहे.
कार्यकारी निर्माते म्हणून अनुनेहा घोडके आणि निर्मिती व्यवस्थापक म्हणून यश सणस यांनी काम पाहिले आहे. अक्षय लोणदे यांनी सिंक साऊंड, शर्मा यांच्या टीमने प्रकाश योजना, तर विजय म्हस्के यांनी प्रॉडक्शन हेड म्हणून जबाबदारी सांभाळली आहे.
ट्रेलरमधील रहस्य आणि ॲक्शन पाहता ‘देवघर ऑन रेंट’बाबत प्रेक्षकांमध्ये उत्सुकता निर्माण झाली आहे. आता 25 सप्टेंबरला चित्रपट प्रदर्शित झाल्यानंतर या रहस्यमय कथेला प्रेक्षकांचा कसा प्रतिसाद मिळतो, हे पाहणं महत्त्वाचं ठरणार आहे.
अधिक बातम्या वाचण्यासाठी येथे क्लिक करा.
Related Posts
मी मराठी मनोरंजन क्षेत्रातील नवीन चित्रपट, सिरीयल्स आणि सोशल मीडियावर ट्रेंड होणाऱ्या घडामोडींवर खास लेखन करते. अचूक माहिती आणि वाचकांना समजेल अशा सरळ शैलीत रिपोर्टिंग करणं हे माझं प्राधान्य आहे.