पुण्यातील प्रसिद्ध ढोल-ताशा पथकांमध्ये ‘कलावंत’ ढोल-ताशा पथकाचाही समावेश आहे. या पथकात मराठी मनोरंजनसृष्टीतील अनेक कलाकार सहभागी होतात. अभिनेत्री श्रुती मराठे, सिद्धार्थ जाधव, तेजस्विनी पंडित, सौरभ गोखले यांच्यासह अनेक कलाकारांचे ढोल-ताशा वादनाचे फोटो आणि व्हिडीओ गणेशोत्सवादरम्यान सोशल मीडियावर व्हायरल झाले.
दरम्यान, अभिनेते विद्याधर जोशी यांनी ‘कलावंत’ पथकातील कलाकारांच्या वादनाबाबत सोशल मीडियावर काही प्रश्न उपस्थित केले. त्यावर अभिनेत्री श्रुती मराठे यांनी कमेंट करत थेट उत्तर दिलं. त्यानंतर दोन्ही कलाकारांमध्ये झालेला संवाद चर्चेत आला.
विद्याधर जोशी यांनी फेसबुकवर पोस्ट शेअर करत विसर्जन मिरवणुकीत ‘कलावंत’ पथकातील कलाकार प्रत्यक्षात किती वेळ वादन करतात, असा प्रश्न विचारला. सोशल मीडियावरील रील्समध्ये ज्या जोशात कलाकार वादन करताना दिसतात, त्याच जोशात ते सतत वादन करतात का, असंही त्यांनी विचारलं.
या पोस्टवर श्रुती मराठे यांनी कमेंट करत आपल्या पथकाच्या सराव आणि वादनाबाबत माहिती दिली. कलाकार सुमारे दीड महिना सराव करतात, असं त्यांनी सांगितलं. गणेशोत्सवाच्या ११ दिवसांत १४ वेळा वादन केलं जातं, तर विसर्जनाच्या दिवशी जवळपास साडेसात तासांची मिरवणूक असते, असंही श्रुती यांनी स्पष्ट केलं.
‘आम्हाला वादन करायला मनापासून आवडतं’, असं सांगत श्रुती यांनी वादनाबाबत आणखी शंका असल्यास पुढच्या वर्षी प्रत्यक्ष येऊन पाहण्याचं आवाहन केलं. याचवेळी त्यांनी, ‘घरी बसून फेसबुकवर टाकून प्रश्नांची उत्तरं मिळत नाहीत’, अशा शब्दांत प्रतिक्रिया दिली.
श्रुती मराठे यांच्या कमेंटनंतर विद्याधर जोशी यांनीही त्यांना उत्तर दिलं. श्रुती यांच्या कमेंटमधील पहिल्याच तीन ओळींमध्ये आपल्या प्रश्नाचं उत्तर मिळाल्याचं त्यांनी सांगितलं.
‘माझा तुझ्यावर पूर्ण विश्वास आहे’, असं म्हणत प्रत्यक्ष येऊन पाहण्याची गरज नसल्याचंही त्यांनी स्पष्ट केलं. वादन करणाऱ्यापेक्षा ते ऐकणाऱ्या किंवा पाहणाऱ्या व्यक्तीला अधिक त्रास होऊ शकतो, हा आपला वैयक्तिक अनुभव असल्याचं त्यांनी नमूद केलं.
आपल्याला हे प्रश्न केवळ सोशल मीडियावरील रील्स पाहिल्यामुळे पडले होते आणि प्रत्यक्ष वादन पाहिलेलं नव्हतं, असंही विद्याधर जोशी यांनी स्पष्ट केलं. फेसबुकवर प्रश्न विचारल्यानंतर श्रुती यांनी त्याला उत्तर दिल्याबद्दल त्यांनी त्यांचे आभार मानले.
तसंच, ‘तुला माझा राग आला असेल तर ते योग्यच आहे’, असंही विद्याधर जोशी यांनी आपल्या कमेंटमध्ये म्हटलं.
या संपूर्ण संवादामुळे श्रुती मराठे आणि विद्याधर जोशी यांच्यातील सोशल मीडिया चर्चा लक्षवेधी ठरली. श्रुती यांनी ‘कलावंत’ पथकाच्या सराव आणि वादनाबाबत माहिती दिली, तर विद्याधर जोशी यांनी आपला प्रश्न रील्स पाहिल्यानंतर निर्माण झाल्याचं स्पष्ट केलं.
अधिक बातम्या वाचण्यासाठी येथे क्लिक करा.
Related Posts
मी मराठी मनोरंजन क्षेत्रातील नवीन चित्रपट, सिरीयल्स आणि सोशल मीडियावर ट्रेंड होणाऱ्या घडामोडींवर खास लेखन करते. अचूक माहिती आणि वाचकांना समजेल अशा सरळ शैलीत रिपोर्टिंग करणं हे माझं प्राधान्य आहे.