जुई सोशल मीडियावर चांगलीच सक्रिय असते. शूटिंगच्या सेटवरील क्षणांपासून ते वैयक्तिक आयुष्यातील अपडेट्सपर्यंत ती अनेक गोष्टी चाहत्यांसोबत शेअर करत असते. नुकतीच तिने इन्स्टाग्राम स्टोरीवर एक पोस्ट केली.
या स्टोरीमध्ये जुईने ‘सुटका झाली… मोठा अनर्थ टळला…’ असं लिहिलं आहे. त्यासोबत तिने कॅप्टनचे आणि वैमानिकाचे आभार मानले आहेत. त्यामुळे विमानप्रवासादरम्यान काहीतरी गंभीर प्रकार घडला होता का, असा प्रश्न चाहत्यांना पडला आहे.
यापूर्वी जुईने विमानाने अमरावतीला जात असल्याची स्टोरी शेअर केली होती. त्यात एअरपोर्टचा व्ह्यू आणि नाश्ता करतानाचा फोटो तिने पोस्ट केला होता. त्यानंतर तिने स्टार प्रवाहवरील अभिनेत्री एतेशा संझगिरी आणि माधवी निमकर यांच्यासोबतचा फोटोही शेअर केला होता.
स्टार प्रवाहकडून अनेकदा वेगवेगळ्या शहरांमध्ये कार्यक्रम किंवा विशेष उपक्रम आयोजित केले जातात. अशा कार्यक्रमांसाठी मालिकांमधील कलाकार उपस्थित राहतात. याच कारणासाठी जुई गडकरी, एतेशा संझगिरी आणि माधवी निमकर अमरावतीला गेल्या असण्याची शक्यता व्यक्त केली जात आहे.
जुईच्या पोस्टमधून विमानात काही तांत्रिक अडचण निर्माण झाली असावी, असा अंदाज सोशल मीडियावर व्यक्त केला जात आहे. मात्र, नेमकं काय घडलं याचा खुलासा जुईने आपल्या पोस्टमध्ये केलेला नाही. त्यामुळे या प्रसंगाबाबत अधिकृत माहिती अद्याप समोर आलेली नाही.
दरम्यान, जुई गडकरीच्या ‘ठरलं तर मग’ मालिकेतही सध्या महत्त्वाचं वळण पाहायला मिळत आहे. अर्जुन आपल्या वकिलीच्या जोरावर सायलीची केस लढतो आणि तिला जामीन मिळवून देतो. मात्र, त्यानंतर प्रियासह शत्रू गट पुन्हा एकदा सायली आणि अर्जुनला अडचणीत आणण्याचा प्रयत्न करत आहे.
प्रियाने मानसीला आपल्या जाळ्यात ओढल्याचं कथानकात दाखवण्यात आलं आहे. सायलीविरोधात खोटी साक्ष देण्यासाठी मानसीवर दबाव टाकण्याचा प्रयत्न केला जातो. त्याचवेळी अर्जुनवरही हल्ला करण्याचा कट रचला जातो.
मालिकेच्या नुकत्याच झालेल्या भागात अर्जुनवर जीवघेणा हल्ला झाल्याचं पाहायला मिळालं. ही गोष्ट सायलीपासून लपवण्यात आली होती. मात्र, एका फोनमुळे तिला अर्जुनवर हल्ला झाल्याची माहिती मिळते आणि तिच्यासमोर परिस्थितीचं गांभीर्य येतं.
एकीकडे मालिकेतील या नाट्यमय घडामोडींमुळे जुई गडकरी चर्चेत आहे, तर दुसरीकडे तिच्या विमानप्रवासातील पोस्टने चाहत्यांचं लक्ष वेधून घेतलं आहे. जुईने नेमका कोणता प्रसंग अनुभवला, याबाबत आता तिच्या पुढील अपडेटची प्रतीक्षा आहे.
अधिक बातम्या वाचण्यासाठी येथे क्लिक करा.
Related Posts
मी मराठी मनोरंजन क्षेत्रातील नवीन चित्रपट, सिरीयल्स आणि सोशल मीडियावर ट्रेंड होणाऱ्या घडामोडींवर खास लेखन करते. अचूक माहिती आणि वाचकांना समजेल अशा सरळ शैलीत रिपोर्टिंग करणं हे माझं प्राधान्य आहे.