Rumani Khare: सिनेविश्वातील प्रसिद्ध कवी आणि गीतकार संदीप खरे यांच्या घरी आनंदाची बातमी आहे. त्यांच्या लेकीचा, अभिनेत्री रुमानी खरे हिचा साखरपुडा नुकताच पार पडला आहे. रुमानीने ही खास बातमी चाहत्यांसोबत शेअर करत सर्वांनाच सुखद धक्का दिला आहे.
आज, १३ डिसेंबर रोजी, रुमानीचा साखरपुडा कुटुंबीय आणि जवळच्या मित्रपरिवाराच्या उपस्थितीत पार पडला. साखरपुड्याचे फोटो सोशल मीडियावर शेअर होताच त्यावर शुभेच्छांचा वर्षाव होत आहे. अनेक मराठी कलाकारांनी कमेंट्स करत या नवदाम्पत्याला शुभेच्छा दिल्या आहेत.
रुमानी खरेने ‘तू तेव्हा तशी’ या झी मराठीवरील मालिकेतून अभिनय क्षेत्रात पदार्पण केलं होतं. राधा ही भूमिका तिने प्रभावीपणे साकारली होती. या भूमिकेसाठी तिला पुरस्कारही मिळाला होता. त्यानंतर ती ‘दुर्गा’ या मालिकेतही झळकली. आता रुमानी आयुष्याच्या नव्या टप्प्यात प्रवेश करत आहे.
रुमानीचा साखरपुडा लोकप्रिय अभिनेता स्तवन शिंदे याच्याशी झाला आहे. स्तवनने स्वतः साखरपुड्याचे फोटो शेअर केले असून, पहिल्याच फोटोत तो गुडघ्यावर बसून रुमानीला अंगठी घालताना दिसतो.
स्तवन शिंदेने मराठी आणि हिंदी मालिकांमध्ये काम केलं आहे. ‘स्टार प्रवाह’वरील ‘तुमचं आमचं सेम असतं’ या मालिकेतून तो घराघरांत पोहोचला. याशिवाय ‘पार्टी’ आणि ‘क्लास ऑफ 83’ या चित्रपटांमध्येही त्याने भूमिका साकारल्या आहेत.
साखरपुड्यावेळी दोघांनीही पारंपरिक वेश परिधान केला होता. गुलाबी रंगाच्या साडीत रुमानी अतिशय सुंदर दिसत होती, तर स्तवनही पारंपरिक पोशाखात उठून दिसत होता. त्यांच्या फोटोंवर यशोमन आपटे, ऋजुता देशमुख, सिद्धार्थ चांदेकर, प्रार्थना बेहेरे, मिताली मयेकर यांसह अनेक कलाकारांनी शुभेच्छा दिल्या आहेत.
अधिक बातम्या वाचण्यासाठी येथे क्लिक करा.
Related Posts
मी मराठी चित्रपट, वेब सिरीज आणि टीव्ही मनोरंजन क्षेत्रातील ताज्या बातम्या, ट्रेंड्स आणि अपडेट्स वाचकांपर्यंत जलदगतीने पोहोचवतो. सत्य माहिती आणि सोप्या भाषेत रिपोर्टिंग करणं ही माझी ओळख आहे.