Battle of Galwan Teaser: सलमान खानने आपल्या वाढदिवसाच्या निमित्ताने चाहत्यांना खास भेट दिली आहे. त्याच्या बहुप्रतिक्षित चित्रपटाचा ‘बॅटल ऑफ गलवान’ टीझर अखेर प्रदर्शित झाला आहे. अवघ्या १ मिनिट १२ सेकंदांचा हा टीझर चित्रपटाची थीम थेट आणि प्रभावीपणे मांडतो.
टीझरमध्ये सलमान खान भारतीय सैन्य अधिकारी म्हणून दिसतो. त्याचा लूक गंभीर, शांत आणि कणखर आहे. फार संवाद न करता केवळ नजरेतूनच तो आपल्या भूमिकेची ताकद दाखवतो. शेवटच्या काही क्षणांत त्याची खंबीर नजर प्रेक्षकांच्या मनात ठसते.
या चित्रपटात भारत-चीन सीमेवरील संघर्षाची पार्श्वभूमी आहे. हिमालयीन भागातील कठीण परिस्थिती, सैनिकांचा संघर्ष आणि त्याग टीझरमध्ये ठळकपणे दिसतो. युद्धाची वास्तविकता दाखवण्याचा प्रयत्न यात करण्यात आला आहे.
टीझरमधील पार्श्वसंगीत लक्ष वेधून घेतं. हिमेश रेशमिया यांचं संगीत दृश्यांचा प्रभाव अधिक वाढवतं. प्रत्येक फ्रेममध्ये सैनिकांचं धैर्य आणि शौर्य जाणवतं.
चित्रपटाचं दिग्दर्शन अपूर्व लखिया यांनी केलं आहे. हा सिनेमा केवळ युद्धावर आधारित नाही, तर सीमेवर लढणाऱ्या जवानांचं खरं आयुष्य दाखवतो. सलमान खानसोबत चित्रांगदा सिंग महत्त्वाच्या भूमिकेत दिसणार आहे. चित्रपटाची निर्मिती सलमान खान फिल्म्सकडून करण्यात आली आहे.
टीझरमध्ये ऐकू येणारा संवाद, ‘मौत से क्या डरना, उसे तो आना है’, चित्रपटाची संपूर्ण भावना व्यक्त करतो. देशासाठी प्राण पणाला लावणाऱ्या सैनिकांच्या निर्भीकतेचं ते प्रतीक आहे.
‘बॅटल ऑफ गलवान’ हा चित्रपट १७ एप्रिल २०२६ रोजी प्रदर्शित होणार आहे. टीझर पाहिल्यानंतर सलमान खानच्या चाहत्यांमध्ये चित्रपटाबाबत मोठी उत्सुकता निर्माण झाली आहे.
अधिक बातम्या वाचण्यासाठी येथे क्लिक करा.
मी मराठी मनोरंजन क्षेत्रातील नवीन चित्रपट, सिरीयल्स आणि सोशल मीडियावर ट्रेंड होणाऱ्या घडामोडींवर खास लेखन करते. अचूक माहिती आणि वाचकांना समजेल अशा सरळ शैलीत रिपोर्टिंग करणं हे माझं प्राधान्य आहे.