एका मुलाखतीत बोलताना दिपालीने सांगितलं की, तिचं वजन कमी होण्यामागे फक्त कमी जेवण हे कारण नव्हतं. उलट घरात विविध पदार्थ बनवले जायचे आणि सर्वजण आवडीने जेवतही होते. मात्र, त्या वातावरणात टिकून राहण्यासाठी सतत विचार करावा लागत होता.
तिने सांगितलं की, घरात मानसिक ताण खूप मोठ्या प्रमाणात होता. प्रत्येक क्षणी गेम, रणनीती आणि पुढचा डाव याचाच विचार डोक्यात सुरू असायचा. यामुळे शरीरापेक्षा मन अधिक थकत होतं आणि त्याचा परिणाम वजनावरही झाला.
दिपालीने तिच्या फिटनेस प्रवासाबद्दलही मनमोकळेपणाने सांगितलं. काही वर्षांपूर्वी तिचं वजन जवळपास 80 किलोपर्यंत गेलं होतं. गेल्या दोन वर्षांत तिने मेहनत घेत स्वतःमध्ये मोठा बदल घडवून आणला. फिट झाल्यानंतर हा नवा बदल प्रेक्षकांसमोर यावा, अशी तिची इच्छा होती.
विशेष म्हणजे, ‘बिग बॉस मराठी’च्या पहिल्या सीझनपासून तिला या शोसाठी ऑफर येत होत्या. मात्र तिने सलग पाच सीझन नाकारले. अखेर सहाव्या सीझनमध्ये नव्या आव्हानासाठी आणि स्वतःला सिद्ध करण्यासाठी तिने शोमध्ये सहभागी होण्याचा निर्णय घेतला.
दिपालीने सांगितलं की, या संपूर्ण प्रवासात तिच्या मनात एकच ध्येय होतं, ते म्हणजे 100 दिवस घरात टिकून राहणं. कोणतीही परिस्थिती असली तरी हे लक्ष्य पूर्ण करायचं, असा निर्धार तिने केला होता. अखेर तिने हे ध्येय पूर्ण केल्याचा आनंद आणि अभिमान असल्याचंही ती म्हणाली.
अधिक बातम्या वाचण्यासाठी येथे क्लिक करा.
Related Posts
मी मराठी मनोरंजन क्षेत्रातील नवीन चित्रपट, सिरीयल्स आणि सोशल मीडियावर ट्रेंड होणाऱ्या घडामोडींवर खास लेखन करते. अचूक माहिती आणि वाचकांना समजेल अशा सरळ शैलीत रिपोर्टिंग करणं हे माझं प्राधान्य आहे.