‘कॅरी ऑन स्पायगिरी’ ते ‘हेरगिरी चालू आहे’, मराठी रंगभूमीवर नावबदलाची चर्चा

मराठी रंगभूमीवर सध्या दोन नव्या नाटकांच्या नावबदलाची चर्चा रंगली आहे. प्रेक्षकांमध्ये होणारा गैरसमज टाळण्यासाठी निर्माते आणि दिग्दर्शकांनी हा निर्णय घेतला आहे. नावात बदल करून नाटकाचा आशय अधिक स्पष्टपणे प्रेक्षकांपर्यंत पोहोचवण्याचा प्रयत्न करण्यात आला आहे.

इंग्रजी, हिंदी आणि गुजराती रंगभूमीवर वेगळी छाप पाडणारे भरत दाभोळकर यांनी आता मराठी रंगभूमीकडे मोर्चा वळवला आहे. त्यांच्या इंग्रजी ‘कॅरी ऑन स्पायगिरी’ या नाटकावर आधारित मराठी नाटकाचं नाव आधीही तेच ठेवण्यात आलं होतं. मात्र, या नावामुळे अनेकांना हे नाटक इंग्रजी किंवा हिंदी भाषेतील असल्याचा समज होत होता.

हा गैरसमज दूर करण्यासाठी नाटकाचं नाव बदलून ‘हेरगिरी चालू आहे’ असं ठेवण्यात आलं. नावबदलाची घोषणा देखील वेगळ्या पद्धतीने करण्यात आली. स्वतःच्या रिक्षेवर नाटकाचं पोस्टर लावून भरत दाभोळकर यांनी विलेपार्ले परिसरात फेरी मारली आणि त्यानंतर दीनानाथ मंगेशकर नाट्यगृहात पोहोचून प्रयोग सादर केला.

याबाबत बोलताना भरत दाभोळकर म्हणाले की, नाटकातील विनोदाची शैली मराठी रंगभूमीवर फारशी पाहायला मिळत नाही. तरीही प्रेक्षकांनी नाटकाला चांगला प्रतिसाद दिला. मात्र नावामुळे निर्माण होणारा संभ्रम लक्षात घेऊन शीर्षकात बदल करण्यात आला.

दरम्यान, अभिनेत्री निर्मिती सावंत यांच्या नव्या नाटकाचं नावही बदलण्यात आलं आहे. सुरुवातीला ‘लाडकी विहीण योजना’ या नावानं चर्चेत आलेलं हे नाटक आता ‘विहीणबाई जोरात’ या नावानं रंगभूमीवर आलं आहे.

दिग्दर्शक राजेश देशपांडे यांनी सांगितलं की, नाटकातील मुख्य व्यक्तिरेखेचं नाव ‘योजना’ असल्यामुळे सुरुवातीला त्या शब्दाचा वापर शीर्षकात करण्यात आला होता. पण अनेक प्रेक्षकांना हे एखाद्या सरकारी योजनेशी संबंधित असल्याचा समज झाला. त्यामुळे नाटकाचा खरा आशय स्पष्ट व्हावा आणि प्रेक्षकांपर्यंत योग्य संदेश जावा, यासाठी नावात बदल करण्याचा निर्णय घेण्यात आला.

या नाटकात कौटुंबिक नात्यांतील हलकेफुलके प्रसंग, मिश्किल संवाद आणि विनोदी घडामोडींची मांडणी करण्यात आली आहे. लेखक प्रथमेश शिवलकर यांच्या लेखणीतून साकारलेल्या या नाटकाला कलाकार आणि निर्मात्यांचीही भक्कम साथ लाभली आहे.

एकूणच, मराठी रंगभूमीवर प्रेक्षकांशी अधिक जवळीक साधण्यासाठी आणि गैरसमज दूर करण्यासाठी नाटकांच्या नावात बदल करण्याचा नवा ट्रेंड पाहायला मिळत आहे. योग्य शीर्षकामुळे नाटकाचा विषय अधिक स्पष्टपणे पोहोचतो, हेच या निर्णयातून दिसून येत आहे.

अधिक बातम्या वाचण्यासाठी येथे क्लिक करा.

Related Posts