Kshitish Date: ‘धर्मवीर’ चित्रपटात एकनाथ शिंदेची भूमिका साकारणारा अभिनेता क्षितीश दाते आता नव्या नाटकासाठी सज्ज झाला आहे. अभिनेते, लेखक आणि दिग्दर्शक हृषिकेश जोशी यांच्या ‘बोलविता धनी’ या आगामी नाटकाबद्दल सध्या नाट्यवर्तुळात मोठी चर्चा आहे. या नाटकाची निर्मिती प्रवीण भोसले, भरत नारायणदास ठक्कर, समृद्धी तांबे, गंधाली कुलकर्णी आणि सुनंदा काळुसकर यांनी केली असून लेखन-दिग्दर्शन हृषिकेश जोशींचंच आहे.
या नाटकात क्षितीश दोन अगदी वेगळ्या भूमिका साकारत आहे. तो सांगतो, “दोन्ही व्यक्तिरेखा पूर्णपणे वेगळ्या आहेत. एकाच वेळी दोन माणसांचं रूप घेणं हे खूप वेगळं आणि त्याचवेळी आव्हानात्मक आहे. कथा दोन काळांमध्ये पुढे सरकते आणि नावाप्रमाणेच ‘बोलविता धनी’ हा शब्द नाटकात वेगवेगळ्या अर्थांनी वापरला जातो.” त्याच्या मते, बोलणारा एक असला तरी पडद्यामागून दिशा देणारी दुसरीच व्यक्ती असते, ही गोष्ट नाटकात महत्त्वाची ठरते.
गेल्या काही वर्षांत क्षितीशने लोकमान्य टिळक, एकनाथ शिंदे यांसारख्या नेतृत्वाच्या व्यक्तिरेखा साकारल्या. याच्या तुलनेत या नाटकातील भूमिका पदाने कनिष्ठ असली तरी त्याचं आव्हान अधिक रंजक असल्याचं तो म्हणतो. हृषिकेशसोबतच्या कामाच्या अनुभवाबद्दल बोलताना तो म्हणतो, “त्यांचे लेखन मला फार आवडतं. ‘नांदी’, ‘संयुक्त मानअपमान’ ही नाटकं मी पाहिली आहेत. शिवाय आम्ही ‘मी व्हर्सेस मी’मध्येही एकत्र काम करतोय. त्यामुळे हृषिकेशचा फोन येताच मी क्षणाचाही विचार न करता होकार दिला.”
या नाटकात विनोदाचं अंग ठळक असून ते सहकुटुंब पाहता येईल. कलाकार निवडीतील हृषिकेशची पारख उत्कृष्ट असल्याचं क्षितीश सांगतो. या नाटकात ओंकार कुलकर्णी, संग्राम साळवी यांसह एकूण 13 कलाकार आहेत. नाटक जुना आणि फारसा चर्चेत नसलेला एक महत्त्वाचा ऐतिहासिक प्रसंग उलगडतं, हेही तो सांगतो.
क्षितीशचा विश्वास आहे की एकाच रंगमंचावर 13 कलाकारांना पाहण्याचा जो थरार असतो, तो प्रेक्षकांना नक्की अनुभवायला मिळेल. ‘बोलविता धनी’ हे नाटक नाट्यरसिकांसाठी खऱ्या अर्थाने पर्वणी ठरेल, याची त्याला खात्री आहे.
अधिक बातम्या वाचण्यासाठी येथे क्लिक करा.
Related Posts
मी मराठी चित्रपट, वेब सिरीज आणि टीव्ही मनोरंजन क्षेत्रातील ताज्या बातम्या, ट्रेंड्स आणि अपडेट्स वाचकांपर्यंत जलदगतीने पोहोचवतो. सत्य माहिती आणि सोप्या भाषेत रिपोर्टिंग करणं ही माझी ओळख आहे.