Gajendra Ahire: ‘Not Only Mrs Raut’सारख्या चित्रपटातून वेगळी ओळख निर्माण करणारे दिग्दर्शक गजेंद्र अहिरे आता नव्या चित्रपटासह प्रेक्षकांसमोर येत आहेत. त्यांच्या आगामी चित्रपटाचं नाव आहे ‘पप्याच्या पिंकीची लव्हस्टोरी’. या चित्रपटाचं पहिलं पोस्टर नुकतंच प्रदर्शित झालं आहे.
नावावरूनच हा चित्रपट प्रेमकथेवर आधारित असल्याचं लक्षात येतं. मात्र ही प्रेमकथा सरळसाधी नसून, त्यात नाट्यमय वळणं असणार असल्याचं संकेत पोस्टरमधून मिळतात. आशयघन विषय मांडण्याची शैली ही गजेंद्र अहिरे यांची ओळख असून, या चित्रपटातूनही काहीतरी वेगळं पाहायला मिळणार अशी अपेक्षा आहे.
‘नीळकंठ मास्तर’ या चित्रपटाची निर्मिती करणाऱ्या अक्षर फिल्म्स प्रायव्हेट लिमिटेडच्या बॅनरखाली या चित्रपटाची निर्मिती करण्यात आली आहे. पायल पठारे आणि मेघमाला पठारे या चित्रपटाच्या निर्मात्या आहेत. दिग्दर्शनाची संपूर्ण जबाबदारी गजेंद्र अहिरे यांनीच सांभाळली आहे.
या चित्रपटाचं पोस्टर एनसीपीए येथे प्रदर्शित करण्यात आलं. या कार्यक्रमाला अभिनेत्री आणि दिग्दर्शिका मृणाल कुलकर्णी प्रमुख पाहुण्या म्हणून उपस्थित होत्या. यावेळी चित्रपटाशी संबंधित कलाकार आणि तंत्रज्ञांची टीमही उपस्थित होती.
या चित्रपटात प्रेम, मैत्री, गुन्हा आणि त्याग अशी वेगवेगळी अंगं पाहायला मिळणार आहेत. कथा, पटकथा, संवाद आणि गीतलेखन हे सगळं काम गजेंद्र अहिरे यांनी केलं असून, संगीतही त्यांनीच दिलं आहे. चित्रपटातून एक नवी कोरी जोडी प्रेक्षकांच्या भेटीला येणार असून, त्यांची केमिस्ट्री लक्ष वेधून घेईल, असा विश्वास व्यक्त केला जात आहे.
ऋषिकेश वांबूरकर, कश्मिरा, अमित रेखी, रिषी आणि अभिजीत दळवी यांच्या या चित्रपटात महत्त्वाच्या भूमिका आहेत. गाणी पं. शौनक अभिषेकी, आदर्श शिंदे आणि आनंदी जोशी यांनी गायली आहेत. सध्या या चित्रपटाच्या प्रदर्शनाची तारीख जाहीर झालेली नसली, तरी पोस्टरमुळे उत्सुकता नक्कीच वाढली आहे.
अधिक बातम्या वाचण्यासाठी येथे क्लिक करा.
Related Posts
मी मराठी चित्रपट, टीव्ही सिरीयल्स आणि ओटीटीवरील ट्रेंडिंग अपडेट्स आणि मनोरंजन बातम्या वाचकांपर्यंत पोहोचवते. विश्वासार्ह माहिती आणि सोप्या भाषेतील प्रेझेंटेशन हे माझ्या लेखनाचं वैशिष्ट्य आहे.