Bolvita Dhani Natak: अभिनय, लेखन आणि दिग्दर्शन—या तिन्ही क्षेत्रात आपली छाप सोडलेले हृषिकेश जोशी पुन्हा एकदा नव्या नाटकासह रंगमंचावर परत येत आहेत. ‘अमरदीप + कल्पकला + सृजन थिएटर्स’ निर्मित आणि ‘सेरेंडिपिटी आर्ट्स’च्या सौजन्याने साकारलेलं हे नाटक म्हणजे ‘बोलविता धनी’. नांदीनंतर हृषिकेश यांचं हे दुसरं मोठं दिग्दर्शन असून रसिकांमध्ये याबद्दल मोठी उत्सुकता आहे.
या नाटकाची कल्पना त्यांना एनएसडीच्या माजी संचालक अनुराधा कपूर यांनी सुचवली. ‘गोष्ट संयुक्त मानापनाची’चा प्रयोग पाहिल्यानंतर त्यांनी हृषिकेश यांना एका वेगळ्या विषयावर लिहिण्याची प्रेरणा दिली. त्यातूनच हे नाटक जन्माला आलं. सामाजिक, सांस्कृतिक आणि राजकीय परिस्थितीवर हलक्याफुलक्या शैलीत भाष्य करणारी ही गोष्ट प्रेक्षकांना जवळची वाटेल, असं हृषिकेश सांगतात.
‘बोलविता धनी’ हे केवळ मुद्दे मांडणारं नाटक नाही. यात विनोद आहे, ड्रामा आहे, एक छोटंसं प्रेमकथानक आहे आणि काही जुन्या घटनांनाही संदर्भ आहेत. प्रेक्षकांना गुंतवून ठेवणारी कथा आणि मंचावरील टायमिंग या दोन्हींचा उत्तम मेळ याठिकाणी दिसतो, असा विश्वास टीम व्यक्त करते.
कलाकारांच्या बाबतीतही नाटक दमदार आहे. क्षितीश दाते, संग्राम साळवी, ओंकार कुलकर्णी, मयुरी रानडे आणि सिमरन सईद या कलाकारांच्या प्रमुख भूमिका आहेत. त्यांच्यासोबतच प्रद्युम्न गायकवाड, परमेश्वर गुट्टे, निरंजन जावीर, सागर यार्दी, अजिंक्य पोंक्षे, दीपक गोडबोले आणि निलेश गांगुर्डेही महत्त्वाच्या भूमिका साकारत आहेत. खास बाब म्हणजे, रंगमंचाच्या पडद्यामागे काम करणारे—मेकअपमन, प्रोडक्शन मॅनेजर, हेअर ड्रेसर आणि वेशभूषाकार—हेही यावेळेस अभिनयात दिसणार आहेत. यामुळे नाटकाला वेगळाच स्पर्श मिळतो.
या सगळ्यानंतर प्रेक्षकांच्या मनात एकच प्रश्न—‘बोलविता धनी’ नक्की कोण? याचं उत्तर मिळण्यासाठी आता जास्त प्रतीक्षा करावी लागणार नाही. 13 डिसेंबरला पुण्यातील बालगंधर्व रंगमंदिरात रात्री 9.30 वाजता नाटकाचा पहिला प्रयोग होणार आहे. तर मुंबईत शुभारंभ 24 डिसेंबरला दुपारी 4 वाजता दीनानाथ नाट्यगृह, विलेपार्ले येथे होईल.
अधिक बातम्या वाचण्यासाठी येथे क्लिक करा.
Related Posts
मी मराठी चित्रपट, टीव्ही शो आणि ओटीटीवरील नवीन अपडेट्स, रिव्ह्यू आणि ट्रेंडिंग बातम्या वाचकांपर्यंत पोहोचवतो. वेगवान, स्पष्ट आणि फॅक्ट-बेस्ड रिपोर्टिंग करणं हे माझं वैशिष्ट्य आहे.