गेल्या काही दिवसांपासून मराठी रंगभूमीवर ‘आमने सामने’ या नाटकावरून वाद सुरू आहे. कलाकारांना अचानक नाटकातून काढून टाकल्याच्या आरोपांमुळे निर्माते आणि कलाकार यांच्यातील मानधनाचा मुद्दा चर्चेत आला आहे. आता ज्येष्ठ अभिनेते आणि लेखक संजय मोने यांनी सोशल मीडियावर केलेल्या एका पोस्टमधून या वादावर सूचक भाष्य केले आहे.
संजय मोने यांनी कोणत्याही व्यक्तीचे किंवा नाटकाचे नाव न घेता निर्मात्यांच्या नफा-तोट्याच्या भूमिकेवर प्रश्न उपस्थित केला आहे. त्यांच्या या पोस्टची सध्या मराठी मनोरंजनविश्वात चर्चा होत आहे.
‘आमने सामने’ नाटकाचा वाद नेमका काय?
या वादाची सुरुवात अभिनेता रोहन गुजर आणि अभिनेत्री केतकी पालव यांनी केलेल्या आरोपांनंतर झाली. मानधनात वाढ करण्याची मागणी केल्यामुळे निर्मात्यांनी कोणतीही पूर्वसूचना न देता आपल्याला नाटकातून बाहेर काढल्याचा आरोप या कलाकारांनी केला होता.
दुसरीकडे, निर्माते मंगेश कदम आणि लीना भागवत यांनीही आपली बाजू मांडली होती. कलाकारांकडून वारंवार अवास्तव मानधनवाढीच्या मागण्या होत असल्यामुळे हा निर्णय घ्यावा लागल्याचे त्यांनी स्पष्ट केले होते. त्यामुळे या प्रकरणात कलाकारांचे मानधन, निर्मात्यांचे आर्थिक नियोजन आणि दोन्ही बाजूंचे हक्क यावर चर्चा सुरू झाली.
संजय मोने यांची पोस्ट नेमकी काय?
संजय मोने यांनी आपल्या अधिकृत फेसबुक अकाऊंटवर पोस्ट शेअर करत म्हटले आहे,
“निर्मात्याला तोटा झाला की त्याला कला आठवते आणि फायदा झाला की व्यवसाय आठवतो. मग कलाकारांना असं वाटलं तर ते गैर आहे की बरोबर?”
या विधानातून त्यांनी निर्मात्यांच्या नफा-तोट्याच्या भूमिकेबरोबरच कलाकारांच्या अपेक्षांबाबतही प्रश्न उपस्थित केला आहे. त्यांनी पोस्टमध्ये कोणाचेही नाव घेतलेले नसले तरी ‘आमने सामने’ नाटकाच्या वादाच्या पार्श्वभूमीवर त्यांच्या विधानाकडे पाहिले जात आहे.
याआधीही ज्येष्ठ कलाकारांनी मांडली होती मते
‘आमने सामने’ नाटकाच्या वादावर यापूर्वी अभिनेते प्रशांत दामले आणि अभिनेत्री वंदना गुप्ते यांसारख्या ज्येष्ठ रंगकर्मींनीही आपली मते व्यक्त केली आहेत. आता संजय मोने यांच्या पोस्टमुळे हा विषय पुन्हा चर्चेत आला आहे.
या संपूर्ण प्रकरणामुळे मराठी रंगभूमीवरील कलाकारांचे मानधन, निर्मात्यांची आर्थिक जबाबदारी आणि कलाकार-निर्मात्यांमधील करार यांसारखे मुद्दे पुन्हा ऐरणीवर आले आहेत.
अधिक बातम्या वाचण्यासाठी येथे क्लिक करा.
Related Posts
मी मराठी मनोरंजन क्षेत्रातील नवीन चित्रपट, सिरीयल्स आणि सोशल मीडियावर ट्रेंड होणाऱ्या घडामोडींवर खास लेखन करते. अचूक माहिती आणि वाचकांना समजेल अशा सरळ शैलीत रिपोर्टिंग करणं हे माझं प्राधान्य आहे.