Marathi Actress Nisha Parulekar: मुंबईसह राज्यातील २९ महानगरपालिकांसाठी १५ जानेवारी रोजी मतदान पार पडलं. आज, १६ जानेवारी रोजी मतमोजणी सुरू असून निकाल जाहीर होत आहेत. मुंबई महापालिकेच्या निवडणुकीकडे संपूर्ण राज्याचं लक्ष लागलं होतं, कारण येथे भाजप, शिंदे गटाची शिवसेना तसेच ठाकरे गट आणि मनसे यांच्यात चुरशीची लढत पाहायला मिळाली.
प्रारंभिक निकालांनुसार, भाजप-शिंदे गटाची युती मुंबईत आघाडीवर असून अनेक जागांवर विजय मिळवत आहे. याउलट, ठाकरे गटाला मोठा फटका बसल्याचं चित्र दिसत आहे. प्राथमिक आकडेवारीनुसार भाजपाने शहरातील बहुतांश प्रभागांमध्ये आघाडी घेतली आहे.
या निवडणुकीतील सर्वात चर्चेचा विजय म्हणजे मराठी अभिनेत्री निशा परुळेकर यांचा. त्यांनी कांदिवली पूर्व प्रभाग क्रमांक २५ मधून दणदणीत विजय मिळवला आहे. या प्रभागातील लढत हायव्होल्टेज होती, कारण त्यांच्यासमोर ठाकरे गटाच्या माधुरी भोईर यांचं मोठं आव्हान होतं.
यंदा भाजप आणि शिंदे गटाच्या शिवसेनेत युती झाली होती. त्यानुसार वॉर्ड क्रमांक २५ भाजपकडे गेला आणि पक्षाने निशा परुळेकर यांना उमेदवारी दिली. स्थानिक शिवसेना नेते शेखर शेरे यांनी अपक्ष म्हणून निवडणूक लढवली होती. मात्र मतदारांनी निशा परुळेकर यांच्यावर विश्वास दाखवत त्यांना स्पष्ट विजय दिला.
निशा परुळेकर या फक्त अभिनेत्री नाहीत, तर भाजपचे विधानपरिषद आमदार प्रवीण दरेकर यांच्या समर्थक आणि पक्षाच्या सक्रिय कार्यकर्ती आहेत. अनेक वर्षांपासून त्या संघटनेत काम करत असून सामाजिक उपक्रमांमध्येही सहभागी आहेत.
मराठी मनोरंजन विश्वात निशा परुळेकर यांची ओळख भक्कम आहे. त्यांनी ‘सही रे सही’ या नाटकात भरत जाधव यांच्यासोबत काम केलं आहे. तसेच ‘काळुबाई पावली नवसाला’, ‘अशी होती संत सखू’, ‘पोलीस लाईन’, ‘हरी ओम विठ्ठला’ यांसारख्या चित्रपटांत त्यांनी भूमिका साकारल्या आहेत. ‘दख्खनचा राजा जोतिबा’ मालिकेतील महालक्ष्मी अंबाबाईची भूमिका विशेष गाजली होती.
या विजयामुळे निशा परुळेकर यांनी मनोरंजन विश्वासोबतच राजकीय क्षेत्रातही आपली ओळख निर्माण केली आहे. कांदिवली पूर्वमधील मतदारांनी त्यांच्यावर विश्वास दाखवत त्यांच्या राजकीय प्रवासाला भक्कम सुरुवात करून दिली आहे.
अधिक बातम्या वाचण्यासाठी येथे क्लिक करा.
मी मराठी चित्रपट, टीव्ही सिरीयल्स आणि ओटीटीवरील ट्रेंडिंग अपडेट्स आणि मनोरंजन बातम्या वाचकांपर्यंत पोहोचवते. विश्वासार्ह माहिती आणि सोप्या भाषेतील प्रेझेंटेशन हे माझ्या लेखनाचं वैशिष्ट्य आहे.