Sunil Tambat: ‘शिवा’ ही लोकप्रिय मालिका लवकरच प्रेक्षकांचा निरोप घेणार असली, तरी मालिकेतील एका कलाकाराकडून आनंदाची गोड बातमी आली आहे. मालिकेत लक्ष्मण देसाईची भूमिका करणारा अभिनेता सुनील तांबट नुकताच बाबा झाला आहे. त्याच्या घरी एका गोंडस मुलीचं आगमन झालं आहे.
सुनीलने सोशल मीडियावर खास पोस्ट शेअर करून ही आनंदवार्ता चाहत्यांपर्यंत पोहोचवली. त्या पोस्टमध्ये त्याने पत्नी प्रतिमा दातारसोबतचा एक खास क्षण दाखवला आहे — प्रतिमाच्या डोहाळजेवणाचा लूक आणि त्यांच्या लेकीच्या छोट्याशा पायाचा फोटो पाहून चाहत्यांची मनं जिंकली.
“आमच्या आयुष्यातली भूमिका बदलली”
या पोस्टमध्ये सुनील लिहितो, “आमच्या आनंदाचा बॉक्स अखेर उघडला गेलाय. आमच्या खऱ्या आयुष्यातील भूमिका आता बदलल्या आहेत. आम्ही एका गोंडस मुलीचे आई-वडील झालोय.”
ही गोड बातमी समजताच मराठी कलाविश्वातून शुभेच्छांचा वर्षाव सुरू झाला. मालिकेतील शिवा, म्हणजेच अभिनेत्री पूर्वा कौशिक हिने ‘अय्यो’ असं लिहून भावूक इमोजी शेअर केल्या, तर अमृता पवार, ऐश्वर्या नारकर, पूजा कातुर्डे, ऋतुजा बागवे यांसारख्या अनेक कलाकारांनी अभिनंदन केलं.
सुनील तांबटची कामगिरी
टेलिव्हिजनवरील ओळखीचा चेहरा असलेला सुनील तांबट ‘योग योगेश्वर जय शंकर’, ‘जय भवानी जय शिवाजी’ यांसारख्या मालिकांमध्ये झळकला आहे. सध्या तो रंगभूमीवर ‘२१७ पद्मिनी धाम’ या नाटकातही काम करत आहे. ‘शिवा’ मालिकेत त्याची लक्ष्मण देसाई ही भूमिका प्रेक्षकांना विशेष भावली होती.
अधिक बातम्या वाचण्यासाठी येथे क्लिक करा.
मी मराठी चित्रपट, वेब सिरीयल्स आणि मनोरंजन जगतातील ताज्या बातम्या, रिव्ह्यू आणि ट्रेंडिंग अपडेट्स सोप्या भाषेत वाचकांसमोर मांडतो. नेहमी अचूक आणि विश्वासार्ह माहिती देणं हेच माझं प्राधान्य आहे.