Sai Kalyankar: स्टार प्रवाहवरील ठिपक्यांची रांगोळी या मालिकेमुळे घराघरात पोहोचलेली अभिनेत्री सई कल्याणकर सध्या खास कारणामुळे चर्चेत आहे. सई लवकरच आई होणार असून तिने ही आनंदाची बातमी नुकतीच चाहत्यांसोबत शेअर केली.
आई होण्याचा अनुभव प्रत्येक स्त्रीसाठी वेगळा असतो. कामाचा व्याप असला तरी अनेक अभिनेत्री हा टप्पा आनंदाने स्वीकारतात. मराठी मालिकाविश्वातून गेल्या काही दिवसांत अशाच अनेक गोड बातम्या समोर आल्या आहेत. त्यात आता सई कल्याणकरचं नावही जोडलं गेलं आहे.
अलीकडेच सईचा डोहाळे जेवण सोहळा पार पडला. या कार्यक्रमाचे फोटो सोशल मीडियावर झपाट्याने व्हायरल होत आहेत. विशेष म्हणजे या खास दिवशी तिच्या ठिपक्यांची रांगोळी मालिकेतील जवळच्या मैत्रिणी नम्रता प्रधान आणि तन्वी बर्वे उपस्थित होत्या. नम्रताने सुमी तर तन्वीने प्राची ही भूमिका साकारली होती. दोघींनीही “मी आत्या होणार” आणि “मी मावशी होणार” असे मजेशीर फलक हातात धरलेले फोटो शेअर केले आहेत.
सईनेही काही सुंदर फोटो पोस्ट करत एक भावनिक कॅप्शन लिहिलं आहे. सात महिन्यांपासून एका छोट्या चमत्काराला हृदयाजवळ जपून ठेवत असल्याचं तिने म्हटलं आहे. बेबी बंप सगळं काही सांगत असल्याचंही तिने नमूद केलं.
सई कल्याणकर सध्या झी मराठीवरील कमळी या मालिकेत राधिका ही भूमिका साकारत आहे. याआधी तिने ‘दख्खनचा राजा ज्योतिबा’ आणि ‘फ्रेशर्स’ या मालिकांमध्येही काम केलं आहे. अभिनयासोबतच सई गाण्यातही सक्रिय आहे. ती सोशल मीडियावर तिच्या गाण्यांचे व्हिडिओ शेअर करत असते.
सईचा पती पेशाने डॉक्टर आहे. ही गोड बातमी समोर येताच चाहत्यांनी सोशल मीडियावर तिच्यावर शुभेच्छांचा वर्षाव केला आहे. अनेकांनी तिला काळजी घेण्याचा सल्लाही दिला आहे.
अधिक बातम्या वाचण्यासाठी येथे क्लिक करा.
मी मराठी मनोरंजन क्षेत्रातील नवीन चित्रपट, सिरीयल्स आणि सोशल मीडियावर ट्रेंड होणाऱ्या घडामोडींवर खास लेखन करते. अचूक माहिती आणि वाचकांना समजेल अशा सरळ शैलीत रिपोर्टिंग करणं हे माझं प्राधान्य आहे.