Prarthana Behere: मराठी अभिनेत्री प्रार्थना बेहेरे हिच्या आयुष्यातील कठीण काळ अजूनही संपलेला नाही. १४ ऑक्टोबर २०२५ रोजी एका रस्ते अपघातात तिच्या वडिलांचं निधन झालं होतं. या घटनेनंतर प्रार्थनाने सोशल मीडियावरून आपल्या भावना व्यक्त केल्या होत्या.
वडिलांच्या निधनाला दोन महिने पूर्ण झाल्यानंतर प्रार्थनाने आता इन्स्टाग्रामवर एक भावनिक व्हिडीओ शेअर केला आहे. या व्हिडीओमध्ये बाबांबद्दल बोलताना तिच्या डोळ्यांतून अश्रू वाहताना दिसतात. मनातलं दु:ख आवरता न आल्याचंही ती स्पष्टपणे सांगते.
“आज १४ तारीख आहे. बाबांना जाऊन दोन महिने झाले. खरं सांगायचं तर मला काय बोलावं तेच कळत नाहीये,” असं सांगताना ती भावूक होते. “हे दु:ख आहे आणि ते कायम राहील. मी ते शब्दांत मांडू शकत नाही,” असंही ती म्हणते.
प्रार्थनाने सांगितलं की, तिचे बाबा तिला नेहमी आनंदी राहायला सांगायचे. अभिनेत्री म्हणून प्रेक्षकांचं मनोरंजन करणं हीच तिची जबाबदारी आहे, असं ते तिला बजावत असत. “तू तुझं काम प्रामाणिकपणे कर,” हा त्यांचा सल्ला कायम तिच्या मनात आहे, असं प्रार्थनाने सांगितलं.
तिने पुढे सांगितलं की, बाबांच्या हयातीत तिनं केलेलं एक काम आता प्रेक्षकांसमोर येणार आहे. “बाबांचा आशीर्वाद माझ्यासोबत आहेच, पण मला तुमचाही आशीर्वाद हवा आहे,” असं ती म्हणाली. उद्या एक खास प्रोजेक्ट प्रेक्षकांसाठी घेऊन येणार असल्याचंही तिनं नमूद केलं.
या पोस्टवर मराठी कलाविश्वातून प्रतिक्रिया येत आहेत. अभिनेत्री तेजस्विनी पंडित हिने, “हा तुझा सर्वोत्तम प्रोजेक्ट ठरेल,” अशा शब्दांत तिला शुभेच्छा दिल्या. तर हृता दुर्गुळे हिने घट्ट मिठीचा इमोजी शेअर करत आधार व्यक्त केला आहे. चाहत्यांनीही प्रार्थनाला धीर देत, “तुमचे बाबा सदैव तुमच्यासोबत आहेत,” अशा भावना व्यक्त केल्या आहेत.
अधिक बातम्या वाचण्यासाठी येथे क्लिक करा.
Related Posts
मी मराठी चित्रपट, वेब सिरीयल्स आणि मनोरंजन जगतातील ताज्या बातम्या, रिव्ह्यू आणि ट्रेंडिंग अपडेट्स सोप्या भाषेत वाचकांसमोर मांडतो. नेहमी अचूक आणि विश्वासार्ह माहिती देणं हेच माझं प्राधान्य आहे.