Bai Tuza Ashirvad Serial: स्टार प्रवाह वाहिनीवर सध्या टीआरपीसाठी मोठे बदल पाहायला मिळत आहेत. गेल्या दोन महिन्यांत वाहिनीने चार नव्या मालिकांची घोषणा केली आहे. यापैकी ‘वचन दिले तू मला’ आणि ‘मी सावित्रीबाई जोतीराव फुले’ या मालिका सुरू झाल्या आहेत. तर ‘तुझ्या सोबतीने’ ही मालिका १९ जानेवारीपासून प्रेक्षकांच्या भेटीला येणार आहे.
या सगळ्यांमध्ये आता स्टार प्रवाहने आणखी एक नवी मालिका जाहीर केली आहे. तिचं नाव आहे ‘बाई तुझा आशीर्वाद’. या मालिकेचा प्रोमो नुकताच प्रदर्शित झाला असून, त्याला प्रेक्षकांकडून चांगला प्रतिसाद मिळतोय.
प्रोमोमध्ये नऊवारी साडी नेसलेली एक महिला गृहप्रवेश करताना दिसते. तिच्यासोबत तिचा नवरा असतो. मात्र घरात प्रवेश केल्यानंतर तिला सर्वत्र पसारा, अस्ताव्यस्त किचन आणि लिव्हिंग रूम दिसतात. त्यामुळे तिचा थोडासा भ्रमनिरास होतो. पण ती लगेच कमरेला पदर खोचते आणि घराची जबाबदारी हातात घेते.
पार्श्वभूमीत मालिकेचा नायक म्हणतो की, आमचं घर सुंदर आहे आणि आमच्यासाठी ते मंदिरासारखं आहे. घराला घरपण बाईमुळेच येतं, असंही तो सांगतो. त्यामुळे ही मालिका एका कुटुंबकथेसारखी असणार असल्याचं दिसत आहे.
हा प्रोमो पाहून काही प्रेक्षक खूश झाले आहेत. तर काही नेटकऱ्यांना या मालिकेचं कथानक पाहून ‘आम्ही सातपुते’ हा जुना मराठी चित्रपट आठवला आहे. सोशल मीडियावर तशा प्रतिक्रिया देखील येत आहेत.
दरम्यान, या मालिकेत कोणते कलाकार असणार आहेत, याची माहिती अद्याप जाहीर करण्यात आलेली नाही. मात्र ‘बाई तुझा आशीर्वाद’ ही मालिका लवकरच प्रेक्षकांच्या भेटीला येणार आहे, एवढंच वाहिनीकडून सांगण्यात आलं आहे.
अधिक बातम्या वाचण्यासाठी येथे क्लिक करा.
मी मराठी चित्रपट, वेब सिरीज आणि टीव्ही मनोरंजन क्षेत्रातील ताज्या बातम्या, ट्रेंड्स आणि अपडेट्स वाचकांपर्यंत जलदगतीने पोहोचवतो. सत्य माहिती आणि सोप्या भाषेत रिपोर्टिंग करणं ही माझी ओळख आहे.