चित्रपट निर्माते अशोक पंडित यांनी सोशल मीडियावर पोस्ट शेअर करत त्यांना श्रद्धांजली वाहिली. दीर्घकाळ प्रेक्षकांचं मनोरंजन करणाऱ्या या निर्मात्याच्या निधनाने त्यांच्या चाहत्यांनाही धक्का बसला आहे.
‘CID’मुळे मिळाली देशभरात ओळख
बी. पी. सिंह यांचं पूर्ण नाव बृजेंद्र पाल सिंह असं होतं. 1998 मध्ये सुरू झालेल्या ‘CID’ या मालिकेच्या माध्यमातून त्यांनी भारतीय टेलिव्हिजनवर वेगळी छाप उमटवली. गुन्ह्यांचा तपास, रहस्य आणि प्रत्येक भागातील अनपेक्षित वळणं यामुळे ही मालिका अनेक वर्षे प्रेक्षकांच्या पसंतीस उतरली.
मालिकेतील एसीपी प्रद्युम्न, दया आणि अभिजीत ही पात्रं प्रेक्षकांच्या विशेष लक्षात राहिली. या मालिकेच्या निर्मिती आणि दिग्दर्शनात बी. पी. सिंह यांची महत्त्वाची भूमिका होती. पडद्यामागे काम करण्यासोबतच त्यांनी मालिकेत डीसीपी शमशेर सिंह चित्रोले ही भूमिकाही साकारली होती.
‘आहट’सह अनेक कार्यक्रमांशी जोडले गेले
बी. पी. सिंह यांनी केवळ क्राइम मालिकांपुरतं काम मर्यादित ठेवलं नाही. 1995 मध्ये सुरू झालेल्या ‘आहट’ या लोकप्रिय भयमालिकेच्या निर्मिती आणि दिग्दर्शनाची जबाबदारीही त्यांनी सांभाळली. रहस्य आणि भीती यांचा संगम असलेल्या या मालिकेनेही प्रेक्षकांमध्ये लोकप्रियता मिळवली.
याशिवाय ‘हम ने ली है शपथ’ आणि ‘गुटुर गु’ यांसारख्या कार्यक्रमांशीही ते संबंधित होते. त्यांच्या कारकिर्दीची सुरुवात दूरदर्शनवर कॅमेरामन म्हणून झाली. पुढे त्यांनी निर्माता आणि दिग्दर्शक म्हणून टेलिव्हिजन क्षेत्रात स्वतःचं स्थान निर्माण केलं.
FTII चे अध्यक्ष म्हणूनही सांभाळली जबाबदारी
निर्मिती आणि दिग्दर्शनासोबतच बी. पी. सिंह यांनी फिल्म अँड टेलिव्हिजन इन्स्टिट्यूट ऑफ इंडिया (FTII) चे अध्यक्ष म्हणूनही काम पाहिलं होतं. त्यांच्या कारकिर्दीत त्यांनी विविध प्रकारच्या कार्यक्रमांमधून प्रेक्षकांचं मनोरंजन केलं.
‘CID’ आणि ‘आहट’सारख्या मालिकांमुळे भारतीय टेलिव्हिजनवर स्वतःची ओळख निर्माण करणाऱ्या बी. पी. सिंह यांच्या निधनाने मनोरंजनविश्वातील एक महत्त्वाचं व्यक्तिमत्त्व हरपलं आहे.
अधिक बातम्या वाचण्यासाठी येथे क्लिक करा.
Related Posts
मी मराठी मनोरंजन क्षेत्रातील नवीन चित्रपट, सिरीयल्स आणि सोशल मीडियावर ट्रेंड होणाऱ्या घडामोडींवर खास लेखन करते. अचूक माहिती आणि वाचकांना समजेल अशा सरळ शैलीत रिपोर्टिंग करणं हे माझं प्राधान्य आहे.